Guwahati, Jan 21: Sonibar salo, Assam-ni Skotong Minister-ni nokdangni chalaienggipa bading chiwalani kosako am•sandianiko dakchina gita, Assam Pradesh Congress Committee, CBI-na chittiko sedoataha.
Indake, CBI-ni gita am•sandianiko dakenba, jinmani mikkango kakketko parak ong•atna aro uamangni kosako dosni kri kragipa sastirangko on•china inenba, APCC mol•molataha.
“North Guwahati-ni Amingaon-o rikmangipa Vandya International School, jekon, CM-ni jikgipa Riniki Bhuyan Sarma-ni bimungo rikahachim, ia skulko nokdongganiko dakangaha aro ua somoio, Riniki Bhuyan Sarma an•tangan, ia skulko, a•dokni skotong Minister bikotchengaha ine parakataha. Indake, ua, Assam a•dokni skotong ong•e, maikai ia International School-ko chalaina ama?” ine ia chittio sing•doatan baksa janapataha.
Unbaksana, Kolkata-o donggipa ge•sa private company, RBS Realtors ba jekon, da•alo Vasistha Realtors ine u•ina gita man•achim, ua company-oni talatna man•gijagipa tangka paisarangko, Assam CM-ni nokdangni chalaienggipa dingtang dingtang firm aro company-rangona watataha. Ia RBS Realtors-o, Ashok Dhanuka director ong•engachim aro ua, Jharkhand MLA baksa gure badingsrukanio jak dongpagipa mandeba ong•achim. Indake, RBS Realtors-oni watatgipa tangka paisani giminba CBI am•sandianiko dakna nanga. R.B.S. Realtors Pvt. Ltd., jean, CM-ni nokdangni chalaienggipa private company, Assam a•dokni aro Assam Pradesh-ni 29 bigha aro 9 lecha mangni gita a•arangko cha•boke ra•giminni bidingoba, CBI sandianiko dakna nanga inenba ia chittio janapangkuaha.
Iana agreba minggipin a•selara, Assam a•doko resom aro muga kildingchi dokgipa barani karkanarango, bara doke cha•giparangko cha•bokanin ong•achim. Ian, Skotong Minister, Himanta Biswa Sarma-ni jikgipani chalaienggipa ‘Golden Thread Company’ ong•a jeon, bara dokgiparangchiko, resom aro mugani kildingchi dokgipa bararangko komigipa damo breenba, dam rake palskaengachim.
Iana agreba, Covid-19 sabisi sokbaani somoio, ma•mong sorkarini on•gimin niamko ja•rikgija, niamgri bang•a PPE kit-rangko Assam sorkarini breani, Upper Assam-o donggipa, CM-ni jikgipani chalaienggipa Kanchanjuri Tea Estate-ona re•gipa ramako sorkarini jinmana chamgimin tangka paisachi tariani, aro pilak CM-ni ning•o nirokenggipa kamrang jekai, supari, koila aro jila kaanirangko bading chiwalanirangko, CBI-ni gita am•sandianiko dakna nanga inenba, APCC ia chittio janape seataha.
