Guwahati, Jan 5: Assam, Dibrugarh district-ni Duliajan minggipaoni saksa bilsi 17 ong·gipa me·chik, jekon Jolly Agarwal ine ma·sina gita man·aha uko mande saksa rim·gittangangaha ine koborko man·soaha.
Demechikni gimaani bidingo mija January 1 tariko me·chikni pagipa, Duliajan police station-o badi ka·enba mamlako segatangaha.
Ia obosta ong·ani bidingo me·chikni pagipa Bharat Agarwal-ni FIR-o janapatani gitade, uni demechik Jolly Agarwal, mija December 31 tarikni attam 6 bajimango tuition-na Gogoi bajar-chipak re·angahachim, indiba tuition-chini re·bapiljani gimin uni mobile-ona call ka·na gita jenten changgni man·genchimoba ra·chakjaha.
Uni matnangatani gita, saksa Jahidul Ali ine ma·sina gita man·gipa me·asasa uni demechikko rim·gittangangaha, maina uaba apsan saloni gimaengachim. Indioba, me·chikni pagipa Agarwal, Jahidul Ali-ni bimingkode FIR-o janapskajaha.
Iani bidingo Dibrugarh-ni Additional Superintendent of police (HQ) Bitul Chetia, me·chikko rim·gittangbebeaniko aganatengon, dos dakgipa mandeko rim·na gita uamang police dolko songe sandiatna gita a·bachengaha ine koborna parakataha.
