Guwahati, Dec 13: Ja·manchake koborko man·soani gita, mija Robibar attamo Assam, Lakhimpur district-ni Rangajan jolo abisa sakgniko kamgnigipa bostu Acid-chi chadrapaha.
Acid pakdapa man·gipa abisa sakgniara Lakhimpur-oni Rehana Begum aro Narada Begum ine ma·sina man·aha. Indake, chadrapgipa mandekoba apsan district-ni Laluk Karunabari-oni Rafiqul Islam ine ma·sina man·skaaha.
Ia ong·anga obostani bidingo police official-ni koborna talatani gitade, uamang abisa sakgnikon Robibar attamo acid-ko godape chadrapaha. Indake, sakgnikon bakan sambajolni Lakhimpur Medical College and Hospital-ona sanna-banna gita rimangahachim indiba ja·mano uamangko nambate sanna gita Assam Medical College and Hospital-china rimjitangaha.
“Rafiqul aro Rehana-maang bilsi-dokna skangan bia ka·aha indiba uamango bi·sa dongjachim. Iako ra·en uamang jiksesani gisepo jegrikanirangba ong·ronga,” ine nokdangoni saksa parakataha.
Indake ong·engon, ia ong·a obostana Lakhimpur police mamlako segataha aro dos dakgipa mandeko rim·na gita sandirokatanikoba a·bachengataha.
