Guwahati, Nov 6: Obostarang bate-bate namjaroroengani gimin, Assam aro Mizoram a·dok damgnini sima-ari jolrango Ma·mongni sipai dolrangko bing·tipe donataha ine koborko man·soaha.

Iani bidingo Southern Range, Assam Deputy Inspector General (DIG), Pa Dilip Dey-ni korborna u·iatani gita, dolgittam SSB company-rangko Assam-ni Cachar aro Karimganj district-rango donataha, indake dolgittam Border Security Force (BSF) sipairangko Mizoram-ni sima-ari jolrango donatskaaha. Dolgni, Sashastra Seema Bal (SSB) company-rangko Cachar-Mizoram sima-ari jol Lailapur aro Khulicherra-rango donataha, indake dolsa SSB company-ko Karimganj-Mizoram sima-ari jol Medlicherra-o donatskaaha, ineba Pa Dey u·iataha.

Ma·mongni sipai dolrangko a·dok damgnini sima-ari jolrango donatna skang, mni Bristibar salo Cachar (Assam) aro Kolasib (Mizoram)ni district administration-rangni official-rang nangrime Assam-Mizoram sima-ari jolrango nirok-sandianirangko dakangaha.
Janapjolna gita, Assam-Mizoram sima-ari jolo Cachar district-ni Lailapur-oni adita te nokrangko aro dokanrangko manderangni so·ani ja·man a·dok damgnini gisepo ding·grikanirang mija jaonin ong·baaha. Iani gisepon, a·dok damgnini gisepo asongrime agan-golporikanirangoba katta mingrikjaenga.

Assam aro Mizoram a·dok damgnini gisepo sima-arini gimin kajia-golmal ong·anichi aro damgni a·dokrangko nangdimatgipa National Highway 306-ko champengatanichi cha·ani bostu aro mal gatgipa trak garirangni re·ruraanirangba da·o ja·donggaataniko man·enga.