Guwahati, July 1: 2019 bilsini December jao Citizenship Amendment Act (CAA)-ko jegale jingengatanio jak donganina Assam-ni MLA Akhil Gogoi-ni kosako ka•gimin case-rangoni bon•kamgipako Bristibar salo National Investigation Agency (NIA) kema wataha.
Gogoi-ko dingtang dingtang saanirang dongani gimin Gauhati Medical College & Hospital-o done sannaniko on•engachim aro uko pattokoniko watchina kachari, Guwahati Central Jail-na ge•etaniko on•atani ja•man ua hospital-oni jakgitele re•ongkatangaha.
“Uamang angko pattoko donkuna jotton ka•ahaoba kakketan da•o chegipa ong•aha,” ine pattokoniko watpilani ja•man Raijor Dal-ni dilgipa aro Sibsagar-ni MLA, kobor ra•timgiparangna parakataha.
2020 bilsini December 12 tariko CAA-ko jegale jinma re•jomani ja•man Gogoi-ko rim•ahachim aro salgnini ja•manon uni case-rangko NIA-na pakwatatskaahachim.
Manderangko ding•chaoatna jotton ka•anina aro CPI (Maoist) dolna kamko ka•gipa ine matnangenba, Unlawful Activities (Prevention) Act-ni ning•o Gogoi-ko rim•ahachim.
Indake ong•genchimoba, re•anggipa jaon uni kosako ka•gipa Chabua case baksana pilak case-rangkon kema wattokahachim. Chabua case-ko watani ja•man Gogoi-ni kosako Chandmari case-na minggipin chargesheet-ko NIA ka•dapahachim indiba Bristibar salo uko pilak case-rangonikon NIA kema wataha.
