Shillong, Mar 29: Assam aro Meghalaya a•dokni simarango bilsi 50-na kingking meligrikna man•jaenggipa biaprangko namatna gita Mongolbar salo, a•dokni damgnini chief minister-rang songgigrike soi ka•grikangaha.Assam a•dokni Chief Minister Himanta Biswa Sarma aro Meghalaya a•dokni Chief Minister Conrad K Sangma, Union Home Minister Amit Shah, a•dok damgnini chief secretary-rang aro Home Ministry-ni gipin official-rangni mikkango soi ka•grikangaha.

A•dok damgnini simarango meligrikgijaniko bon•atna gita songgigrike soi ka•aniara salgro salaram jolna gisik ra•ani sal ong•gen ine Union Home Minister Amit Shah aganaha.

A•dok damgnini gisepo soi ka•grikna gita MHA office-o tom•aniko ong•atanio Meghalaya sorkarini sak 11 aro Assam sorkarioni saksku dilgiparang dongpae bak ra•angaha.

“Narendra Modi-ni Prime Minister ong•a intalan ua salgro salaramni mikkim rasongna dontonggija kamko ka•enga aro ia salara maming golmal gri ong•gipa salgro salaram a•dokrangna namen mongsonggipa sal ong•aha,” ine Amit Shah aganaha.