Shillong, Aug 3: Ru•utbea bilsirangonin Assam aro Meghalaya a•dokni sima jolrango meligrikna man•kujaengani gimin Mongolbar salo, Meghalaya a•dokni Congress Legislature Party (CLP)-ba tom•e chanchirimangaha.
Tom•aniko opposition dolni dilgipa Mukul Sangma dilangaha aro tom•anio Mohendro Rapsang, Miani D Shira, Kimfa Marbaniang, HM Shangpliang aro gipin Congress MLA-rangba bakko ra•angaha.
Tom•a matchotani ja•mano kobor ra•timgiparangna talataniko on•angengon, a•dok damgnini simarango meligrikna man•jaengani a•sel sima jolrango songdongenggipa manderang duk saknaanirangko chakna nangengoba sorkari maming ja•kurangko de•jaenga aro ia jolrango songdongenggipa manderangna maikai dakchakanirangko on•na man•gen, uani bidingo Congress MLA-rang tom•e chanchirimangaha ine Sangma parakataha.
Sangma-ni parakatani gitade, uni chief minister ong•engmiting somoirangon gitcham Congress sorkari, meligrikna man•jaenggipa biaprangni bidingo am•sandienba, nangchongmota lekkarangko Assam sorkarina on•atmanahachim aro da•o ong•enggipa sorkariba iarangni bidingo Assam sorkari baksa agangrikna nangachim.
A•dok damgnini gisepo maiba ku•chakgrikanirangko dakna nanggenchimode uan Meghalaya a•doko songdongenggipa manderangni ra•chakna man•gni ong•na nanggen ineba Sangma parakataha.
Assam aro Meghalaya a•dokni chief minister-rang, re•baenggipa August-ni 6 tariko Guwahati-o tom•e agangriktana siengachim ine nikna man•a.
Sattelite gita nienba, NESAC-ni salgro salaram a•dokrangna sima salna sienggipani bidingo janapatengon, Meghalaya sorkarini on•gimin lekkarangko nie NESAC, simarangko salna man•gen ine Opposition dolni dilgipa parakataha.
Adita salrangna skangsan, Meghalaya a•dokni Iongkhuli songo MeECL-ni songgipa bijoli krongrangko Assam police-rang pe•e galangahani gimin Mukul Sangma, Budbar salo ia biapko re•ange niegen ineba parakataha.
