Guwahati, Aug 6: Guwahati, August 6: Assam aro Meghalaya a•dokni simarango meligrikgijanirangko nipiltaina gita Sukrobar salo a•dok damgnini chief minister-rang, Guwahati songjinmani Assam Administrative Staff College-o tom•aniko ong•atangaha aro ia tom•anio Meghalaya a•dokchipakni Chief Minister Conrad K Sangma baksana Deputy Chief Minister Prestone Tynsong aro gipin Cabinet Minister-rang, chong•motan Sniawbhalang Dhar, Lahkmen Rymbui, Renikton Lyngdoh, Banteidor Lyngdoh, Hamletson Dohling, Brolding Nongsiej, Sanbor Shullai, Dasakhiat Lamare aro Kyrmen Shylla-ba bakko ra•angaha.
Guwahati songjinmao tom•a matchotani ja•man, kobor ra•timgiparangna talataniko on•angengon, Chief Minister-ni gadango ia tom•aniko Guwahati-o sokachakahani gimin Meghalaya a•dokni Chief Minister Conrad Sangma, Assam-ni Chief Minister Himanta Biswa Sarma-ko mittelpilangaha.
“Ia tom•ani chu•sokgipa ong•ahani gimin chinga namen kusi ong•a maina a•dok damgnini gisepo meligrikgijanirangko a•dok damgnini sorkarirangan namatna nangnike dongengachim. Ru•uta bilsirangonin a•dok damgnini simarango meligrikna man•jae jolo songdongenggipa manderang duk saknaanirangko chakna nangtokengahachim,” ine Sangma parakataha.
A•dok damgnini gisepo meligrikgijanirangko namatna gita a•dok damgnian skanirang dongenga ineba ua aganaha.
“Jeko dakgenchimoba chinga dolsa dolgipinko mande ra•grike ja•ku de•na ku•rachakgrikaha. A•dok damgnini gisepo meligrikna man•jaenggipa dam 12 biaprang gnang aro ia dam 12-oni damdok biaprangni gimin da•alni tom•anio Assam sorkari chingna talataniko on•angaha. A•dok damgnini gisepo meligrikna man•jaenggipa biaprangko chinga gadang gadang dake namatna dolgnian ku•rachakgrikaha,” ine Meghalaya CM parakataha.
Sangma-ni parakatani gitade, skanggipa bako a•dok damgnini gisepo meligrikna man•jaenggipa damdok biaprang, chong•motan Tarabari, Gizang, Hahim, Boklapara, Khanapara-Philangkata aro Ratachera jolrangko meligrikgijanirangko namatna dolgni sorkarirang kam ka•angchenggen.
Kamrangko ka•dilna gita a•dok damgnian regional committee-rangko songgen aro ia committee-rangko a•doktangtangni cabinet minister-rang dilgen ineba Sangma parakataha.
“Committee ge•antion cabinet minister sakprak donggen aro ia committee, meligrikna man•jaenggipa biaprangona re•ange nienba da•o changgipin tom•anio report-ko on•anggen,” ine Meghalaya Chief Minister talatangenba, dolgnini gisepo changgipin tom•aniko da•o sal 30-ni gisepon Shillong ong•jaode Guwahati-o ong•atangtaigen ine parakataha.
Indake ong•engon, ia damdok biaprango meligrikgijanirangko namatna man•ahaon a•dok damgnini sorkarirang, gipin biaprango meligrikgijanirangko namatna ja•ku de•angskagen ine Assam-ni Chief Minister Himanta Biswa Sarma parakatskaaha.
Assam aro Meghalaya a•dok damgnini simarang meligrikgijanirangko namatna gita a•dok damgnian kamko ka•enga ine mesokna da•o mikkang sal 30-ni gisepo a•dok damgnini chief minister-rang, apsan Langpih-ona re•ange nianggen ineba Assam CM parakataha.
Also read:
