Shillong, Aug 9: Bilsi 50-na baten Assam aro Meghalaya a•dokni simarango meligrikna man•jaenggipa biaprangoni damdok biaprangko namatna kam ka•anio chu•sokgipa ong•ani ja•man, da•o gnigipa bako bangki dongkuenggipa biaprangkoba namatna gita a•dok damgnini chief minister-rang, a•songni jakgitelani salko maniani ja•man Guwahati songjinmao skanggipa changna tom•e chanchirimanggen ine u•iataha.
Mongolbar salo, Raid Nongtung-ni ning•o donggipa Block 2-ni dilgiparang baksa tom•e chanchirimangani ja•man iako Meghalaya a•dokni Chief Minister Conrad K Sangma parakataha.
Sangma-ni parakatani gitade, da•o dipet a•dok damgnini chief minister-rang tom•na gita tarikko name tik ka•kuja indiba biapde Guwahati songjinmaon ong•gen.
Raid Nongtung-ni ning•o donggipa Block 2-ni dilgiparang baksa tom•e chanchirimani bidingo talataniko on•angengon, ia Block-ni ning•o donggipa dam 18 songrang, batanggimin bilsi 50-na dingtang dingtang neng•nikanirangko chagrongna nangtokahani gimin Meghalaya a•dok ning•on ong•na nangnikaniko paraktokaha aro sorkari uamangni nangnikani gita kamrangko chu•sokate on•na ku•rachakataha ine Meghalaya a•dokni Chief Minister parakataha.
A•dok damgnini simarango man•enggipa neng•nikanirangko namatna gita ia sorkari, kang•kare kae kam ka•enga aro iani a•selan skanggipa bako, meligrikna man•jaenggipa biaprangoni damdok biaprangkode namatna man•aha aro da•o bangki dongkuenggipa damdok biaprangkoba namatna kamko ka•angkugen ineba Sangma parakataha.
Ia kamara walsano namatna man•aigipa kam ong•ja aro ia kamko chu•sokatna gita sorkari, ia kamo nangchakegipa pilak dolrangkon bak ong•atesa kamko ka•anggen ineba Chief Minister parakataha.
