Shillong, May 15: Assam aro Meghalaya a•dokni sima jolrango Khasi-Pnar aro Karbi jatrangni gisepo so•sojengjeng ong•rongengani a•sel Meghalaya a•dokni Khasi-Pnar manderang neng•nikanirangko chagrongna nangrongengani gimin uamangna chel•chakanirangko aro nanga gita dakchakanirangko on•china West Jaintia Hills a•jani Khasi Students Union (KSU), Meghalaya sorkariko didiangaha.
West Jaintia Hills a•jani Khanduli aro samba jolrango donggipa songni manderang, Assam a•dokchipakni sinjetanirangko man•rongengani gimin simani bidingo Assam a•dok baksa da•o gnigipa changna agangrikaniko a•bachengna skangba, ia jolrango songdongenggipa Khasi-Pnar manderangni neng•nikanirangko namatchina gita KSU dabiangaha.
Iani bidingo kobor ra•timgiparangna talataniko on•angengon, Meghalaya a•dok ning•o ga•akgipa West Jaintia Hills-ni Khanduli songo, Karbi Anglong Autonomous Council (KAAC)-ni gita niam gri toll gate-ko songani ja•man ia jolrango so•sojengjeng ong•anirangko nikna man•rongenga ine KSU West Jaintia Hills-ni president Laitphar Syngkrem parakataha.
Syngkrem-ni parakatani gitade, Khanduli songo niam gri songgipa toll gate-ko songni manderang, pe•galani ja•man Meghalaya a•dokni Khasi-Pnar aro Assam a•dokni Karbi jatrangni gisepo bang•en jajaaniko ong•katataha. Ia toll gate-ko pe•galani ja•man dolgnini gisepon tom•tomani dongahachim indiba adita salrangna skang, Karbi manderang, Meghalaya a•dok ning•o ga•akgipa Khanduli songni adita nokrangko so•aha aro songni manderangko a•barangchi re•angnaba on•jaha ine Syngkrem parakataha.
Iandakgipa obostarang ong•ani ja•man Khasi-Pnar aro Karbirangni bading chiwalgrikaniko Khanduli songni dilgiparang champengatna nangao ga•akaha ineba KSU-ni president aganaha.
Mikkangchi ia jolrango songdongenggipa Khasi-Pnar manderang iandake sinjetanirangko man•jana gita Assam sorkari aro KAAC baksa ta•raken agangrikchina ua Meghalaya sorkari aro Jaintia Hills Autonomous District Council (JHADC)-koba didiataha.
