Guwahati, Nov 02: Assam a·doko Congress dolko bilakatpilna aro re·baenggipa 2024 bilsini election-na dolko chu·gimik tarisamsona gita, Congress dolni president gitcham Te Rahul Gandhi-ni re·jomdile Congress dolni gimin a·songni manderangna ma·siate on·aniko a·bachengatgipa Bharat Jodo Yatra-ko apsandake Assam a·dokoba Assam-ni Congress dol mija Mongolbar salo a·bachengataha.

Lower Assam-ni Dhubri-oni Upper Assam-ni Sadiya-ona kingking, Congress dolko nangrimate kim·kim ong·attaina gita nisanko done sal 70-ni gisepo a·dokni chu·gimik km 834 rangko re·jomangna miksonge Assam Pradesh Congress Committee (APCC), ia Bharat Jodo Yatra-ko a·bachengataha aro iako APCC-ni padot Pa Bhupen Kumar Borah-chi dakdilenga.

Assam Congress-ni a·bachengatgipa ia Bharat Jodo Yatra ba re·jomaniko, Assam aro West Bengal-ni sima-ari jolo donggipa Dhubri district-ni Golakganj-oni a·bachenge, Assam aro Arunachal Pradesh-ni sima-ari jologipa Sadiya district-ona kingking dakanggen. Ia re·jomanio, a·dokni Congress dolni pilak niksenggipa dilgiparangna agreba, Te Rahul Gandhi-ko changale ma·mongni adita sak dilgiparangba bakko ra·tokenga ine ja·pangoni u·iataha.