Guwahati, May 9: Assam-ni niksenggipa minister Pa Himanta Biswa Sarma, Assam a•dokni skotong minister gital ong•e Pa Sarbananda Sonowal-ni kamko jako ra•angskagnok.
Robibar salo doloni seoka man•giparangni tom•aniko ong•atanggipao, Pa Sarma-ko ra•doataniko a•songni Prime minister Pa Narendra Modi-ni ra•chakani ja•man Pa Sonowal an•tangni biapo Pa Sarma-ko biming mingaha jekon MLA-rangba namnike ra•chakangtokaha.
Ru•utgija salrangna skang matchotanggipa assembly eleksino, BJP dol dam 60 seat-rango cheeming Assam-o gnigipa changna seoktaipilako man•aha.
Pa Sarma, salgro-salaramo sakgipinrangna nama didianiko on•gipa saksa political dilgipaba ong•enga aro BJP dolo maiba neng•nikanirang dongoba uko namate on•na sapgipa ong•a ine bang•an uko u•itoka.
Gimik chang-brina kingking minister ong•bagipa, batanggimin 2001 bilsio Jalukbari seat-o skanggipa chang ong•e Assam Assembly-na seokako man•chengaha aro uni ja•man joljolan eleksin ong•ata changantin Pa Sarma cherorobaaha.
Bilsi 52-ong•gipa Pa Sarma, jean batanggimin 2015 bilsio Congress doloni ong•kate BJP dolo napeahachim, salgro-salaramo BJP dolko dal•roroatanioba uni mongsonggipa jak donga ine chanako man•pilgipa saksa ong•a.
Home minister-na agreba, Assam a•dokko BJP sorkarini sason ka•mitingo Pa Sarma, mongsonggipa portfolio-rang jekai Finance, PWD, Health aro education-ni minister ong•eba kamko jako ra•e ka•angaha.
Bilsi 1969-ni February 1 tariko atchigipa Pa Sarma, songjinmani Kamrup Academy School-o poraie dal•bagipa ong•a. Graduation aro post-graduation-ko ua Cotton College-o matchote poraiaha. Unbaksana, Government Law College-o ua LLB-ko dakaha aro Gauhati University-oniko Ph.D degree-ko man•aha.
