Shillong, June 15: Adita salrangna skang, Assam a·dokni godown damsaoniko rim·gipa mirongrangara NFSA-ni ning·o ba COVID relief-na chamatgipa mirongrang ong·ja ine Mongolbar salo, Meghalaya a·dokni Chief Minister Conrad K Sangma talataniko on·angaha.
June jana chamatgipa mirongko Meghalaya a·dok man·soaha aro iandake matnanganirangara kakket ong·ja ineba ua parakataha.
Mirong bag laksako Assam-ni godown-oniko rim·aha ine matnanganina talataniko on·angengon, ia mirongrangara ma·giparangna aro bi·sarangna mangrakatgipa cha·ani bosturangko tarina miksonge Food Corporation of India (FCI)-ni watatgipa mirongrangsa ong·achim indiba ia mirong metric ton 1604-san ong·aiani gimin ian bag 33,000-san ong·aigenchim ine Chief Minister parakataha.
Ia mirongrangara a·dok sorkarini ra·chakgimin manufacturer ba cha·ani tarigipa Continental Milkose Ltd’-na watatgipa mirongrangsa ong·achim ine nikna man·a. Ia Continental Milkose Ltd-ara, a·dokni Nutrition Program-rangna cha·anirangko on·skaenggipa company ong·achim.
Wheat Based Nutrition Programme (WBNP)-ni ning·o India sorkari, dingtang dingtang a·dokrangna mirongrangko chame on·ronga aro ia mirongrangko Social Welfare Directorate-ni gita sorkarini ra·chakgimin manufacturer-rangna pakwate on·skarongachim ineba nikna man·a.
Iani bidingo kobor ra·timgiparangna talataniko on·angengon, iandake sorkariko matnanganiranga nama ong·ja, uni gimin matnanganirangko dakna skang pangnan NGO-rang ba Press, kakketko name sandichengna nanga ine a·dokni Chief Minister parakataha.
Continental Milkose Ltd-ni gital tarie watatgipa cha·ani bosturangko sorkari man·soaha ineba Chief Minister parakataha.
Chief Minister-ni parakatani gitade, cha·anirangko tariani bidingo sorkari che·em che·emde sandirikkitjaenga indiba iani bidingo report-ko on·china gita company-oniko bi·ataha.
Sorkarina on·atenggipa cha·ani bosturang porikka ra·e certify ka·gimin ong·aniko nirok sandianiara sorkarini daitoan ong·a ineba Chief Minister talatangaha.
