Guwahati, August 29: Assam-ni Barpeta jolo Jamiul Huda Academy Madrassa-ko Sorkarini a•ao niamni a•palo sruksruk rikahanina District Administration pe•e galaha. Madrassa, sakgni manderangchi bak nanggipa ong•a jekon Barpeta police dol Al Queda bobil dol baksa bakrimani gnanganina sonibar salo rim•aha. Adasa sakgni Akbar Ali aro Abdul kalam Azad niamni a•palo Madrassa-Jamiul Huda Academy-ko rikaha. Police doloni u•iatani gitade uamang sakgnian March jamangoni kate chakenga. Iamang sakgnian Bangladeshi manderangni bobil dingna kam ka•anirango re•ruraanina garirangko on•e dakchakgipa ong•a. Uandake police-rang uamangni jakkalgipa garirangkoba niamo rim•aha.
Ia pee gala mangipa Madrassa Bangladesh a•songoni Mohammad Sumon-na ma•chakna on•gipa ong•a jekon skangoba niamo rim•aha aro ian AQIS-ni sleeper cell-ni manderangko kam ka•atenggipa mongsonggipa mande ong•a. Niamo champengako man•gimin Bangladesh a•songni Ansarullah Bangla Team ba ABT bobil dolniba member saksa ong•a. Indake Sumon ua Madrassa-o skigipa dake dakjee ua biapo ma•chakaha ineba police doloni u•iataha.
