Guwahati, July 13: Skal pil·ani gimin me·chikma saksako songni manderangni doke-sate roani ge·sa video giproroangani ja·man a·jani police uko seng·gnangkale uamangni jakoniko naljokatna man·aha.

Je me·chikmakon uni segipa aro songni manderang skal man·a ine potahachim, uko kaeming doke-sate roanirangko ge·sa video-o niksona gita man·aha.

Ia obostara mija salgnirangna skang, Meghalaya-ni Bajengdoba song jolo ong·ahachim. Indake ia ong·a obostako manderangni social media-rango video-ko watroroani ja·man mija July 12 tarikosa ma·sina gita man·aha.

Ja·pangoniko knasoani gitade, ua me·chikara Assam, Goalpara district-ni Hatigaon songoni ong·a, jean Bajengdoba songni mandeko bia ka·ahachim.

Ua video-o giproroani ja·man Assam police ia mamlako sandirokataha aro ian Bajengdoba songo ong·gipa obosta ine u·ina man·aha. Indake, Meghalaya police-na iako u·iatani ja·man ua me·chikko naljokataha aro jikgipako skal pil·a ine potani gimin segipakoba rim·aha.

“Chinga segipako rim·aha aro uni kosako mamlako segataha. Ia ong·a obostako chinga sandirokatenga,” ine police official u·iataha.

Manderangko skal man·a ine potani ja·man uamangko so·ote galani kosako rakgipa sastiko on·an baksa dai gamchina ge·etani gnanggipa, Assam Witch Hunting (Prohibition, Prevention and Protection) Act-ko a·doko batangimin 2018 bilsionin ra·gataha.