Goalpara, March 13: Assam a·doko songdongenggipa nangrimgimin A·chik NGO-rang, jekai ASYFI, AAGGA, GWF, GNC, GNUWW aro GNUYW, mija March 11 tariko Damra, Bakrapur songo tom·aniko ong·atangenba Garo Development Council (GDC)ko namnikpae ra·chakgipa United Garo Autonomous Council Movement Committee (UGACMC) ni adita sak dilgiparangko ra·galaha ine Sonibar salo koborna parakataha.
Iani bidingo koborna seachi u·iatani gitade, ia bilsi January 28 tariko Assam sorkarini GDC-ko on·na gita parakataniko UGACMC-ni mitam dilgiparang namnikpae ra·chakahani gimin Assam a·dokni nangrimgimin NGO-rang uamangni kosako jegalaniko dakangenba adita salna skang tom·aniko ong·ate UGACMC-ni dilgiparangko ra·galsrangaha.
“Assam sorkarini changni-chang GDC-ko on·ahaoba Assam-o songdongenggipa A·chikrang ra·na jechakenba Garo Autonomous Council (GAC) kosa kingkot dabibaengani gisepon UGACMC-ni dilgiparang GDC-ko ra·na ku·rachakaha. UGACMC-ni dilgiparang, Assam-o songdongenggipa A·chikrango aro gipin dilgiparango mamingkoba sing·cheng-sanchenggija GDC-ko ra·chakahani gimin namnikgijaniko mesoke aro uamangko ra·galna segimin lekkako Goalpara DC-na on·angjolaha” ine NGO-rang koborna parakataha.
Nangrimgimin NGO-rang tom·e chanchirimaniko dakenba UGACMC-ni Adviser, Chairman, General Secretary aro gipin sak 20 membor-rangko ra·galaha. Chinga mikkangchi Garo Autonomous Council (GAC)na dakgrikangkuna gita ru·utgijan gital dilgiparangko seokanggen ineba NGO-ni dilgiparang janapataha.
Indake ong·engon, Assam-ni A·chikrang jeba UGACMC-oniko da·o ra·galako man·giparang baksa nangrime kam ka·genchimode uamangni kosakoba ja·kurangko de·anggen ine NGO-rang mikrakataniko on·atjolaha.
