Guwahati, Oct 31: Assam Karimganj district joloni saksa chona-rema bading-chiwalaniko dake cha·enggipa Surajan Roy minggipa, gong hajal 50,000 tangka kusrarako chimongeming an·tangni namnikbatgipa motorcycle ba bike-ko mija Sonibar salo breangaha.
Roy, an·tangni miksonggipa aro namnikgipa motorcycle-ko brena gita Sonibar attamchibara Showroom-ona re·ange an·tangni tangka kusrarako chimonggipa gong hajal 50 -chi atako gamsoe bike brena nangnikaniko showroom-o kam ka·enggipa mandena aganeaha, uandake showroom-o kam ka·giparang una, uni namnikgipa TVS Apche 160 4V bike-ko mesoke on·aha.
Indake, Roy-ni chimonggipa tangka gong 10 bisilnirarako showroom staff-rangni chanmisiengmitingko jachipchange ra·gipa video-ni social media-o giproroanganiko nikna gita man·aha.
Iandake tangka kusrarako chimongdame namnikatang motorcycle-ko bregipa Suranjan Roy-san ong·aija, iana skangba mija March jao saksa Tamil Nadu-ni V Boopathi minggipa an·tangni tangka kusrarako chimonggipa gong lak 2.6 tangkarangchi uni namnikbatgipa motorcycle-ko breangahachim, uandake uni on·gipa kusrako channa gita showroom-ni staff-rang chu·gimik konta 10 somoirangko nangpilaha.
