Guwahati, Sept 9: Upper Assam, Jorhat district-ni Nimatighat-o mija Butbar attamchibara ring bolgni chatinggrike a·sel ong·gipa biapona Bristibar salo re·ange nirokeao Assam-ni skotong minister Pa Himanta Biswa Sarma, Inland waterways department-o kam ka·enggipa sakgittam manderangko ia obostao nangchape criminal case-ko segatchina police-ko ge·etangaha.
Tikitni gitade, bolsa private ring Maa Kamala-o gae songregipa gimik sak 90 mangni gita gnangchim jean mija Butbar attam 4 bajimango Majuli-china mikkange re·angengmiting somoio sorkarini chalaigipa bolgipin ring baksa chatinggrike Nimati Ghat sambao napsrimaha.
Ringo gagipa gimik sak 90 manderangoni sak 87 mangko mijal attamona sandie man·pilaha indiba sakgni gimaengkua ine aganangenba, ia a·selo rasong gribee me·chik saksani janggi gimaaha aro sianggipa Paimita Das, jean Majuli-ni ge·sa college-o associate professor ong·achim uni nokdangni manderangna sorkarini niam gita tangka gong lak 5 -ko gimaanina on·pilskagen aro nanga ong·ode, ua nokdangoni jenaba sorkarini kamkoba on·na gita ku·chakenga ine Pa Sarma agandapataha.
“Ia a·selna, criminal case-ko segatchina Jorhat Police-ko aganaha aro a·sel ong·ani ja·pangko u·ina gita chugipa gadango sandiataniko dakgen ine parakatan baksa, ia ong·a obosta management-ni kam tik ong·jani a·selsa ong·ahakon ineba Pa Sarma, mijalo daito gnanggipa officialrangko gronge agangrikani ja·man kobor ra·timgiprangna aganangaha.
