Guwahati, June 12: Assam-ni ge·sa Digital News Channel TIME8-ni You Tube account-ko re·anggipa antio, Pakistan a·songoni Revolution PK minggipa dol, ‘hack’ ka·enba, ia account gita Pakistan a·songni nisanko done ‘Respect Holy Prophet (PBUH)’-ko June-ni 9 tariko mesokatskaaha.
Ia Time8 News channel-ara social media platform ong·e, sak million 7-na baten ja·rikgiparang donga aro japrakon komibeoba million 600-na baten video view-rangko man·gipa channel ong·achim.
Indake ong·engon, re·anggipa June 9 tariko ia TIME8-ni news-rangko live on·engmiting somoio rang·san news transmission nosto ong·aha aro ia news channel-o Pakistan a·songni nisan (flag)-sa ong·kate Prophet Muhammad-na ring·mittelanirangkosa knaskana man·aha.
Ia news channel-ni ticker-oba ‘Respect Holy Prophet (PBUH)’ ine seakosa nikna man·skaaha.
TIME8 Digital News Network-ni founder aro managing director Utpal Kanta-ni u·iatani gitade, iani bidingo uamang Assam Police-na badi ka·doangaha aro da·o police-rang iani bidingo am·sandianirangko dakna a·bachengataha.
