Guwahati, April 12: UDISE (United District Information System for Education)-ni ning·o sorkarini ra·chakgimin ba sorkarini jako ra·enggipa skulrangni gadangoniko dingtang dingtang manderangni a·bachengatgipa skulrangko chong·motan, venture school-rangko ra·galchina gita Assam sorkari ge·etanirangko on·ahani gimin, uandakgipa skulrangna PM POSHAN (Mid-day meal)-ko aro merongrangko on·aniko ia April ja 2023-oni a·bachenge dontongataha.
Iani bidingo Samagra Shiksha-ni Mission Director aro State Nodal Officer Dr Om Prakash-ni mija April 6 tariko u·iataniko on·angani gita, PM POSHAN (mid-day meal)-ni namgniko man·enggipa skulrangoniko uandakgipa venture school-rangko ra·galchina Assam-ni pilak district-rangko didiatan baksa, April jaoni dipat ua skulrangna merong on·anirangkoba dontongatchina ge·etaniko on·angaha.
Sorkarioniko dingtang dingtang bil on·anirangko man·e manderangni a·bachengatgipa skulrangni gimin, Assam assembly-o mija chang Budget-na tom·anganio a·dokni Education Department-ni u·iatangni gitade, a·doko gimik-gimang ge 7,670 venture school-rang gnang, uanoni lower primary school ge 4,560 aro upper primary school ge 3,110-mangni gita gnang ine parakatan baksana, sak 10,453 mangni gita lower primary venture school-rango skie on·ani kamko ka·enggiparang donga aro sak 19,054 mang upper primary venture school-rango skie on·tokskaenga ineba u·iatangaha.
