Guwahati, March 24: Assam Assembly election-o AIUDF chee, sorkariko rikna man•genchimode college aro university-rangko kuliani pal, Assam-o Mullah-rangko ong•katatna gita Madrassa-rangkosa kuliskagen ine Assam-ni Minister aro NEDA-ni convenor Himanta Biswa Sarma, AIUDF-ni dilgipa Badruddin Ajmal-ko matnange aganangaha.
Budbar salo, Lahowal-ni BJP candidate Binod Hazarika-na Dibrugarh-o campaign-ko ka•angengon, Congress aro AIUDF dolrang nangrime sorkariko rikna man•genchimode Assam-o Madrassa-rangkosa kuliskagen indiba BJP sorkari bilona re•bapilgenchimode namnamgipa doctor aro engineer-rangko ong•katatna gita uamang engineering college aro university-rangko kuligen ine Sarma parakataha.
“Uni gimin na•simang sana pu•ongen name chanchibo,” ine BJP-ni dilgipa aganaha.
Congress aro AIUDF dolrangni bakrimanina matnangatengon, Dispur-o bilona re•bana gitasa Congress dol, AIUDF baksa nangrimaha ine Sarma parakataha.
“Bilsi 15-na sorkariko chalaianio Congress dolni dakna amgijagipa kamrangko BJP dol, batanggimin bilsi 5-ni gisepon dakaha. Bilsi 15-na Congress dolni sorkariko chalaianio uamang chonchongipa kamrangkosa ka•aiaha indiba batanggimin bilsi 5-ni gisepon Assam-o bang•bea dingtanganiko nikna man•aha,” ine Sarma aganaha.
Lahowal-ni MLA Rituparna Baruah-ko mittelpile aganangengon, Rituparna-ni rakbee kamrangko ka•anichi Lahowal-o bang•en namroro silroroani kamrangko ra•bana man•aha indiba ia chango Lahowal-o susana gita BJP-ni tikitko high command, Chabua-ni MLA Binod Hazarika-na on•skaaha ine Sarma parakataha.
“Chinga na•simangni bi•chakanirangko aro pattianirangko nangenga. Ia changoba chingni sorkari bilona re•bapilgenchimode Rituparna aro Binod sakgnian Lahowal-ni manderangna kamko ka•gen aro bang•bata namroro silroroani kamrangko nikangkuna man•gen. Skango Lahowal-o 100% kamrang chu•sokgipa ong•ahaode ia changode 200 percent kamrangko nikskana man•gnok,” ine Sarma aganaha.
