Guwahati, May 04: Mingsa aiao inmangipa obosta ong·anganio, Assam, Tinsukia district-ni Margherita jolo saksa bilsi 12-ong·gipa me·chik dambeko nokdangni u·igipa me·apa saksa drae til·ekani ja·man so·ote galaha ine koborko man·soaha.

Iani bidingo koborna u·iatani gitade, ua me·chikni manggisiko, kal·ake so·otgipa mandeni nokni paikana a·koloniko Margherita police-rang mija Butbar attamo man·aha.

Koborni gitade, me·chikni nokdangani u·igipa mande saksa Anand Tanti minggipa, ua me·chik bi·sako kal·akani ja·man so·otenba uni manggisiko paikana a·kolo dape galahachim.

Ia obostani bidingo police official-ni koborna talatani gitade, obostako chagronggipa me·chik bi·sa mija April 30 tarik attamo Bihu programme-china re·angahachim, indiba programme ong·ningjani a·sel agre waltingahani gimin me·chik bi·sa uamangni mande ma·sigipa Anand Tanti-ni noko waltuaha, indakmitingo Anand Tanti, cholko ra·enba ua me·chikko drae til·ekani ja·man so·ote paikana a·kolo dape galaha ine janapatenba, me·chikni manggisiko rate porikka ka·na gita watataha aro dosko dake kate chakenggipa Anand Tanti-koba police-rang sandina gita a·bachengataha ine official parakataha.

Indake ong·engon, dos dakgipa mandeni jikgipako police-rang rim·enba sing·sandianiko dakon setangni kragija dakaniko police-rangna ku·rachakaha.

Me·chik bi·sani manggisiko man·ani ja·man, Margherita jolo adita so·so-jengjengko nikangna gita man·aha, jeon ka·a ding·e jingjengatgipa manderang joltangni police station-ko Bristibar salo changduule dos dakgipa mandeko janggi tanga krip sasti on·china dabiangtokaha.