Guwahati, Aug 8: Assam a·dokni Chirang a·jao bilsi 60 ong·gipa me·chikma saksako montol dakgipa ine potchipenba Sukrobar salo so·ote galaha. So·ote galako man·gipa me·chikmara, Runikhata police station-ni ning·o donggipa Kumguri songni Bale Mardi minggipa ong·achim.
Ia Kumguri songara Chirang a·jao diltubatsranggipa biaprangoni damsa ong·e police-rang Robibar salo, ia songona sokangna gita chiring dilgittamko batangna nangahachim.
Sianggipa me·chikmani segipa Bajun Kisko-ni police-rangna parakani gitade, a·sel ong·ani somoio ua an·tangni ma·drangni nokona re·angahachim aro Sonibar walni 9:00 bajimango uni nokona sokbaon ua an·tangni jikgipako sie dongakosa nikeaha.
“Angni nokona sokbaon uko anga nokni a·palo an·chirara dake ga·ake dongakosa nikeaha aro bakan anga iani bidingo songni manderangna u·iataha. Sawa angni jikgipako so·otaha anga ma·sija,” ine sianggipa me·chikni segipa parakataha.
Iani ja·mano songni manderang, songni samba jolo dongenggipa ia mandeni depante Kartik Kisko-naba kobor on·ataha.
Kumguri songo donggipa manderangni parakatani gitade, ia me·chikmako montol dakgipa ine potchipenba uni nokdangni manderangan so·otakon ine chanchichiptokenga.
Ia a·selko name am·sandina gita Runikhata police station-ni circle inspector Ratneswar Barman-ba, gipin sipairang baksa ia songona sokangaha.
“Jasa skangsan Kartik Kisko-ni jikgipa okgitchak sae siangaha aro nokdangni gipin manderangba dingtang dingtang sabisi sakanchirangko man·tokenga. Sianggipa Bale Mardi, noktangni manderangko montol dakenga ine nokdangni manderang potchiptokengachim. Uamangonin uko so·otengnaba gnang, ong·jaode uamang sakoba okamate uko so·otatahakon,” ine songni manderang aganaha.
Indake ong·engon, da·o dipet ia a·selni bidingo police-rang mamingkoba aganna man·kujawa aro ia a·selni bidingo police-rang am·sandina a·bachengkuengani gimin mamingkoba parakna man·kujawa ine circle inspector Ratneswar Barman parakatskaaha.
Sianggipa me·chikni manggisiko post mortem ka·na gita Kajol Gaon-o donggipa JSB civil hospital-ona watataha.
“Da·o dipet chinga iani bidingo darangkoba rim·a dongkuja indiba chinga bakan dos dakgipa mandeko rim·gen,” ineba Barman parakataha.
