Guwahati, July 3: Assam a•doko chi ban re•ani 2-gipa bako dam 28 a•jarangni lakh 11 manderang nangchakeako man•ani a•sel mongolbar salonan jajrenganirang ong•kuenga.
Kobor man•oani gitade ia chi ban re•ani 2-gipa bako a•dokni 80% mangni gita biaprang nangchakeako man•aha.
“Dam 28 a•jarangni lakh 11.34 manderang ia chi ban re•ani 2-gipa bako nangchakeako man•aha. Bang•bea a•jarangon Brahmaputra-ni chirang kengnigipa gadangna babetokaha aro dam 13 chibimarangan gapdotokengaha. Sak hajal 26 manderang relief camp-rango ma•chake dong•tokenga,” inenba official saksa u•iataha.
“Kaziranga National Park-ni ning•o donggipa dam 167 forest camp-rangkon chi mriptokaha. Iani gisepon, gondu mangsani bi•sa chi ban re•ani a•sel chio sripe siangaha. Indake ong•engon, dam 2,200 songrangko chi mriptokenba konta 24-ni gisepon sak 3 manderangni janggirang gimaani koborrangko man•soaha. Assam a•doko May jaoni chi ban re•anio chu•gimik sak 28 manderang janggirangko gimaataha,” inenba ua agandapangkuaha.
Assam a•doko chi ban re•ani 2-gipa bak ian June jani 16 tarikoni a•bachengaha, jeon Dibrugarh-an songjinmarango chi ban re•anio nangchakeako man•batgipa ong•aha. Ia ong•a obostani bidingo name nirok sandianirangko dakan baksana duko ga•akgipa manderangna dakchakaniko on•a gita jotton ka•enga.
Brahmaputra, Subansiri aro Burhidihing chibimarang kena nanggipa gadangna baderoroengaha. Iani gisepon, Goalpara, Bongaigaon, Karbi-Anglong aro Dima Hasao biaprango jimbee mikka waanina mikrakataniko on•ataha.
Indian Metrological Department (IMD)-ni gitade, mongolbar salo Salgro Salaram jolni a•dokrango mikka waanirang, Assam a•doko 44.4 mm mangni gita, Arunachal Pradesh-o 59.5 mm, Nagaland-o 20.7 mm, Manipur-o 18.7 mm, Mizoram-o 29.9 mm, Tripura-o 55.8 mm aro Meghalaya-o 168.0 mm mangni gita mikkarang waanichi bang•bate mikka bitchirangko man•gipa ong•aha. Ia mikka waanirangko nikenba a•doko chi ban re•ani a•sel iarangan ong•a ine u•ina gita man•aha. State Disaster Response Force (SDRF) aro National Disaster Response Force (NDRF) dolrang apsan nangrimenba naljokatani kamrangko Assam-ni bang•a biaprang jekai, Golaghat, Tinsukia aro Majuli-rango dakenga, jeon dakchakpaaniko on•a gita Indian Army-ni sipairangkoba watatpaaha.
Assam a•dok sorkarini gita, chi ban re•ani somoio simsakna nangani bidingo tarisamsoanirangko, iani bidingo chanchirimanirangko dakan baksana District Disaster Management Authority baksa video conferencing gita agan-golpogrikaniko dakenba nangan bosturangko biaprangona sokatani bidingoba chanchirimaniko dakangaha.
Relief-ni bosturang, jekai merong, dal, kari aro samrangko duko ga•akenggipa manderangna suale on•angan baksana nodal officer-rangko a•jatangtango chi ban re•anina tarisamsoanirangko nipiltaianiko dakchina gitaba u•iataha.
Na·simang ia video-koba nina man·gen:
Na·simang iakoba poraina man·gen: Tinsukia-o bisi gnanggipa balwako rang•sitman•enba koila cho•gipa sakgni sia ine chanchichipenga
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
