Guwahati, Oct 3 :1983 bilsio sianggipa manderangni kosako kragijagipa kattarangko aganani gimin Sonibar salo rim·ako man·gipa Assam-ni Congress MLA Sherman Ali-ko salgnina police-rangni ning·o donataha.
Police-rang uko sal 10-na an·tangtangni ning·o donna gita bi·ahachim indiba kachari uko salgninasan police-rangni ning·o donchina raiko on·ataha.
Congress MLA Sherman Ali, saanirang dongani gimin una sanna banani cholrangko on·china gitaba uni ukil, kachario mol·molaha.
1983 bilsio Assam a·dokni Darrang a·jao so·otako man·gipa manderangni kosako kragija kattarangko aganani gimin Sonibar salo, Guwahati-ni police-rang, Congress dolni MLA Sherman Ali-ko rim·ahachim.
1983 bilsio Assam a·dokni Darrang a·jao jingjengatenggipa manderangko goanio sakchet manderang so·otako man·ahachim aro ia manderangko ja·mano a·songna janggitangko on·kanggiparang ine mingahaoba, Ali an·tangni agananio ia manderangko so·otgiparang inesa matnangskaahachim.
Uandaken Ali-ni agangipa kattarangna uni kosako dingtang dingtang dolrang, police station-rango FIR-ko ka·aha aro uandaken ja·mano Guwahati-ni police-rang uko non-bailable section-o pangchake Panbazar police station-ona rim·angahachim.
Iandakgipa kattarangko aganahani gimin Ali-na Assam-ni Congress dolba, show cause notice-ko on·angaha.
