Guwahati, April 20: COVID-19-ni giproroaniko champengna gita Home Affairs Ministry-ni on•atgipa niamrango pangchake Assam a•dokoba re•baenggipa April 30 tarik dipet ja•rikchina gital niamrangko Mongolbar salo Assam State Disaster Management Authority (ASDMA) on•atskaaha.

Ia gital niamrangko parakatani gitade, district official-rango bi•chenge a•palo ba bangbango maiba program-rangko ong•atengon, bakko ra•enggipa manderang mask-rangko ganna nanggen, saksa sakgipinoni chel•tanggrike dongna nanggen aro jakrangko rongtalatjringna nanggen. Iandakgipa program-ko ong•atengon, bak 10-oni bak 5-na bate manderang tom•na man•jawa aro chadenge nigiparang dongna man•jawa.

Bia aro uandakgipa manderangni tom•anirango sak 100-na bate tom•na man•jawa indiba mande sianirangode sak 200-na bate tom•skana man•jawa.

Bazar-rang, super market-rang, dokkanrang aro antio changprak kuligipa bazar-rangkoba attam 6:00 bajiona chipna nanggnok.

Manderangni kam ka•chakgipa biaprangna niamrangko donatengon, man•a dipetde noktangtangoni kamrangko ka•china aro officer-rangna agrede kam ka•giparangoni 50 percent-kode noktangtangon ka•atchina sorkari didiataha.

Officer-rangni chamber-rango tom•anirangko ong•atjachina u•iatengon, an•o donggipa me•chikrang aro bilsi bonga ba una bate chonbata bi•sa donggipa me•chikrangkode noktangtangoni kam ka•na on•china sorkari didiataha.

Kam ka•chakgipa pilak biaprangon mandeni ding•aniko porikka ra•e niani, jak rongtalatani aro uandakgipa bosturangko donchinaba u•iataha.

A•gilsakni seng•aniko skie on•chakgipa biaprang jekai, skul, college aro uandakgiparangna dongimin niamrangni gimin janapatengon, skul, college, university ba uandakgipa biaprango online ba internet gita class-rangko ra•na cholko on•china sorkari u•iataha.

Class-rangko ra•engon salo bak 10-oni bak 5-na bate chatro chatrirangko napna on•jachina aro pringni skulrango dakronggipa jinma tom•e bi•anirangko dakjachina gitaba sorkari u•iataha.

Primary class-rangnade man•a dipet internt gita class-ko ra•chinaba sorkari u•iataha.
Manderangko salruragipa garirangna dongimin niamrangni gimin janapatengon, garirango COVID-19-na dongimin niamrangko ja•rikchina aro auto rickshaw, cycle rickshaw aro taxi-rangoba gariko saltimgipa baksana gario songreenggipa manderangni gisepo chel•tanggrikani dongchina sorkari u•iataha.

City bus aro dingtang dingtang biaprangona manderangko salruraenggipa bus garirango bak 10-oni bak 5-n bate manderangko gatna man•jawa ineba sorkari u•iataha.

Ia niamrangko pe•genchimode Disaster Management Act 2005-ni section 51-60-ni niamrang baksana IPC-ni Section 188-o pangchake sastirangko man•gen ineba Assam sorkari mikrakataha.

Manderang mask-rangko ganjagenchimode aro mande jinmani biaprango skatang sturamramako rim•a man•genchimode gong 1000-ko dai gamna nanggen.