Guwahati, June 15: Assam a·doko COVID-19-ni batrikrikaniko champengna gita Assam sorkari, curfew-ko re·baenggipa June 22 tarikona ra·dodapataha ine Mongolbar salo Assam-ni Health minister Keshab Mahanta parakataha.
Guwahati songjinmao kobor ra·timgiparangna talataniko on·angengon, Guwahati-o curfew-ko kontasana dontongataha aro salantian dokkanrangko aro pilak office-rangkon salni 1:00 bajion chiptokna nanggen ine Mahanta parakataha.
Da·o dipet Assam-o pilak dokkanrangko aro office-rangkoba salantian salni 12:00 bajio chipengachim ine nikna man·a.
Indake ong·engon, Assam a·dokni damchet a·jarangona agrede pilak biaprangon attam 2:00 bajioni pring 5:00 bajionade manderang re·rurana man·jawa ine Assam-ni health minister parakataha.
Mahanta-ni u·iatani gitade, Assam a·dokni Chirang, Udalgiri, West Karbi Anglong, Bongaigaon, Majuli, Dima Hasao, South Salmara aro Charaideo a·jarangode COVID man·giparang komiengani gimin ia a·jarangode champenganirangko komiatskaaha aro ia a·jarangode attam 5:00 bajioni pring 5:00 bajiona curfew-ko ra·gatangskagen.
Assam a·doko a·ja damsaoni damgipinona re·ruraanirangko June 22 tarikona champengatangkugen.
Indake ong·genchimoba Dibrugarh, Tinsukia, Cachar, Sonitpur aro Nagaon a·jarangode re·baenggipa June 21 tariko kingkingba obostarang namkaljagenchimode niamrangko rakbatatkugen aro COVID man·giparang komikujagenchimode ia jarango chu·gimik lockdown-ko ra·gatanggen ine Assam-ni health minister parakataha.
