Guwahati, Dec 22: Assam a•doko donggipa Krishak Mukti Sangram Samiti (KMSS) aro iani chadambe dol Chara Mukti Sangram Samit (CMSS) baksana Nari Mukti Sangram Samiti, Ahom Gana Mansha, Sah Sramik Mukti Sangram Samiti aro gipin dolrang, re•baenggipa December 24 tarikoni Assam a•dok gimikon Citizenship Amendment Act (CAA)-ko jegalanggen ine kobor on•aha.
CMSS dolni dilgipa Rudra Bhuyan-ni Hub News-na koborko on•atani gitade, dingtang dingtang dolrang nangrime re•baenggipa December 24 tarik dipet CAA-ko jegalangtaigen.
“Jegalanio gimik dol 70 NGO-rang bakko ra•anggen aro ia changode chinga mongsongbate Assam a•dokni songadam nokadamrango jegalanirangko dakanggen,” ine Bhuyan parakatenba, uamangni jegalanio NGO-rang, KMSS-ni dilgipa Akhil Gogoi-ko watpilchina gitaba dabianggen ine u•iataha.
Indake ong•engon, Moran Chatra Santha Munin Dwarah (MCSMD) dolni gitade, re•baenggipa January ja dipet CAA-ko jegalangskagen ine MCSMD-ni general secretary, kobor ra•timgiparangna parakatskaaha.
Ia CAA-ko jegalenggipa dol 70 NGO-rangoni, KMSS, CMSS, Nari Mukti Sangram Samiti, Ahom Gana Mansha, Sah Sramik Mukti Sangram Samiti, Axom Premi Juwa Chatra Samaj, Sadou Moran Chatra Santha aro gipin dolrangba ong•paengachim.
CAA-ko jegalenggipa dol 70-o All Assam Students Union (AASU)-ko janapatjahaoba, uamangba an•tangtangni gita dingtang jegalanirangko dakna manchiskaenga ine kobor on•aha.
“Assam a•dokni dingtang dingtang biaprango pilak NGO-rangan, virus-na dongimin niamrangko ja•rike CAA-ko jegalanggen. virus-ni gimin chinga chingni jegalanirangko dontongatchengna nangahachim indiba da•o obostarang namkalengahani gimin chinga January ja dipetde jegalanirangko dakna a•bachengtaignok,” ine AASU-ni membor saksa, kobor ra•timgiparangna parakataha.
