Guwahati, July 8: Bristibar salo Assam a•dokni police-rang, mande sakgniko so•otanio jak donggipa mande saksako, Assam a•dokni Chirang a•jao goe galaha. Police-rangni aganani gitade, ia mande police officer saksani silchidareko ra•e katna jotton ka•engmiting somoio police-rang uko goe galaha.
Ia apsan Bristibar salni pringosan Assam-ni police-rang, Upper Assam-ni Dibrugarh a•jaoba matchu cha•ugipa mande saksako goahachim.
Koborko on•ani gitade, Bristibar salo goe galako man•gipa bilsi 20-ni pante Abdul Khaleque-ko, re•anggipa Mongolbar walo, bilsi 20 ong•gipa sakgipin pante Ayub Ali baksa, Bijni Police Station-ni homeguard Iyad Ali-ko attechi den•e so•otahani gimin police-rang rim•ahachim. Ia homeguard-ko so•otchina gita Bhandara-o sam dokkan dakenggipa Safiyur Rehman, uamangna tangkarangko on•skaahachim ine kobor on•aha.
“Chingni am•sandie man•ani gitade, homeguard Iyad-ko so•otchina gita Safiyur Rehman-sa gong lak 1.5 tangkarangko Ayub aro Abdul-na on•ahachim,” ine Chirang-ni SP Gaurav Upadhyay, kobor ra•timgiparangna parakataha.
Ia a•selni bidingo talataniko on•angengon, Mongolbar walo, Abdul aro Ayub, Bijni police station-ni homeguard Iyad Ali-ko Bhandara sambao dongsoe chadrapaha ine Upadhyay parakataha.
“Iyad Ali-ko Ayub-sa skanggipa attechi den•e ja•mano noktangona re•angpilenba atteko dongnue donahachim. Indiba ja•mano Abdul uko attechi baditaba chang den•e so•otgalaha aro ja•mano atteko rumalchi rongtalatenba, ia atteko Ayub-ni noko dongnue doneaha,” ine Chirang-ni SP aganaha.
A•sel ong•ani ja•man dos dakgipa mande sakgniko police-rang Budbar salo rim•aha aro uamangni dilanganichi uamangni so•otna jakkalgipa atteko man•eaha.
“Uamangni so•otna jakkalgipa silchidarerangko man•ani ja•man, chinga atteko ripakna jakkalgipa rumalkoba sandina nangaha maina ia rumalo so•otako man•gipa mandeni an•chirang dongachim. Rumalko sandina police-rangko rimangengmiting somoio Abdul, Bijni SDPO-ni silchidareko ra•sekaha aro ia silchidarechi police-rangko gona dakon police-rang uko gona nangaha,” ine Upadhyay parakataha.
Abdul-ko goani ja•man police-rang ta•raken uko sepango donggipa hospital-ona ra•angahachim indiba hospital-ona sokangon uko siaha ine doctor-rang parakataha ineba SP aganaha.
Koborko on•ani gitade, batanggimin somoioba Abdul-ko an•tangni jikgipako so•ote an•tangni nok sa•raon gope galahani gimin pattoko donahachim.
Sam dokkan dakgipa Safiyur aro homeguard-ko so•otanio jak donggipa Ayub-ko police-rangni ning•o donatskaaha.
