Boko, Nov 7: Bristibar salo, Meghalaya a•doko donggipa Riangdo-Mauchang songoni mande saksa, Assam Kamrup a•jani Boko jolo donggipa Balijhar songo, milsi peengmiting somoio bijoli sala man•e sina nangaha.
Koborko on•ani gitade, ia mandeara, bilsi 45 ong•gipa Commander Aiu Fau ong•achim aro ua Riangdo songoni gipin sak 18 manderang baksa Balijhar songoniko milsi pena Assam-ona re•baahachim.
Unbaksa re•bagipa gipin manderangni u•iatani gitade, uni milsi pongo bijoli siliting nangenba ua bijoli salako man•aha.
A•sel ong•a bakan ia mandeko Boko Primary Health Centre (PHC)-ona ra•angahachim indiba health centre-ona sokangon uko doctor-rang siaha ine parakataha.
Ia mandeni manggisiko da•o dipet Boko police station-o donkuenga.
