Guwahati, March 8: Batanggimin bilsi bongani gisepo Assam a•dokni manderang namroro silroroaniko nikmanahani gimin ia changoba BJP aro BJP baksa bakrimenggipa dolrangan chepiltaigen ine Sombar salo, Assam a•dokni Chief Minister Sarbananda Sonowal, ku•watsoaha.
“Chinga ia chang election-oba chegen aro gital sorkariko rikpiltaigen. Batanggimin bilsi bongana chingni sorkariko chalaianio Assam-ni manderang, chingni kamo kusi ong•aha.
Assam a•doko BJP dolchi rikgipa sorkari, a•dokna tom•tomaniko aro namroro silroroaniko on•na man•aha,” ine Sombar salo Sonowal, kobor ra•timgiparangna parakataha.
Sonowal-ni aganani gitade, Assam a•doko namroro silroroaniko ra•baanichi BJP dolan manderangna dingtanganiko ra•bana man•aha ine manderang nikenga.
Assam a•doko Assembly election-ni skanggipa bakko re•baenggipa March 27 tariko a•bachengatengon, Assam a•dokni Chief Minister an•tangba, uni Majuli constituency-oni susataiengani gimin ia kattarangko parakataha.
Batanggimin bilsi bongani gisepo Assam a•doko BJP sorkarini chu•sokatanggipa kamrangni gimin janapatengon, “Chinga moila grigipa, tangka paisa jakkalsretani grigipa, bobil dake chakatani grigipa, niam gri napsrukani grigipa Assam a•dokko ku•rachakaha aro chinga ia pilak kamrangkon chu•sokgipa ong•atna gita kakketo kamko ka•aha. Iani giminsa Assam a•dokni manderang BJP dolo bebera•aha,” ine Sonowal parakataha.
Da•al salni bako Assam a•dokni Chief Minister, Union Home Minister Amit Shah-ni janggi tanganiko uni Cabinet Minister Sarma-ni pe•skagipako oprake on•angahachim.
