Guwahati, July 14: Assam a·dokni Morigaon a·jao niam gri ka·rongte (kidney) badinge cha·gipa ma·ningsa sakgniko Sombar salo Assam Police rim·na man·aha.
Morigaon a·jani me·chikma saksa an·tangni depante baksa niam gri manderangoniko ka·rongte breenba pale cha·engachim aro da·o dipet uamang ma·ningsa, komibeoba sakdok manderangoniko iandake ka·rongterangko ra·e pale cha·ahachim.
Morigaon-ni SP Aparna Nataranjan-ni u·iatani gitade, re·anggipa jao ia me·chikma mande saksana tangkarangko bang·e gamna ku·rachakenba, ia mandeni ka·rongteko ra·aha indiba ia me·chikma una gong 50,000-kosan on·aiaha ine ia mande Robibar salo, ia me·chikmani kosako police-rangna badi ka·doangaha.
Ia me·chikmani kosako badi ka·aniko man·soenba police-rang ia ma·ningsa sakgniko rim·aha ine Nataranjan parakataha.
SP-ni u·iatani gitade, batanggimin somoirangoba ia ma·ningsa, manderangna gong lak 6 ba lak 7 tangkarangko gamna ku·rachakenba, ka·rongteko ote ra·manahaode tangkarangko komie game katrongachim.
Ia ma·ningsa sakgnini tol·e ku·rachakaniko man·e songni bang·a manderangan an·tangtangni ka·rongterangko ia ma·ningsana palaha ineba ua parakataha.
Transplantation of Human Organs Act-o dongimin niam gitade India a·songo tangenggipa mandeni ka·rongteko brena ba palna niamrang dongjachim.
