Guwahati, March 30: Assam a•dokna bon•changgijagipa tom•tomani aro namroro silroroaniko Narendra Modi-ni sorkari ra•bana man•aha ine Mongolbar salo, Bharatiya Janata Party (BJP)-ni national president JP Nadda parakataha.
Assam a•dokni Assembly election-na Nalbari a•jani Dhamapur aro Kamrup a•jani Bilasipara aro Rani songrango manderangna aganprakangengon, Congress sorkarini somoiode hajalni hajal manderang aro sipairangba so•otako man•ahachim indiba Modi sorkari baksana Assam-ni Chief Minister Sarbananda Sonowal-chi dilenggipa BJP sorkari, Assam a•doko bobil dake chakatanirangko aro so•sojengjeng ong•anirangko bon•atna man•aha ine Nadda aganaha.
Re•anggipa bilsio Bodo songgigrikaniko dakani ja•man, sak 4000-na baten bobil dake chakatgipa manderang sorkarina bame on•eaha aro ge 5000-na baten silchidarerangko pakwateaha ineba BJP-ni national president parakataha.
Congress dolni kam ka•ani bewalrangko jegalatengon, “Ia dol (Congress), BJP-ko chena gita Kerala a•dokode Left dolrang baksa susagrikenga indiba West Bengal-ode ia apsan dol baksa bakrimskaenga. Uamang toromo pangchakgipa political dolrang baksa bakrimaha,” ine Nadda aganaha.
BJP president-ni aganani gitade, Congress dolchi dilgipa UPA sorkarini somoio, Assam a•dok gong kror 80,000-kosan 13th Finance Commission-oniko man•soahachim indiba Prime Minister Narendra Modi sorkarini somoiode, Assam a•dok gong kror lak 1.55-ko 14th Finance Commission-oniko man•an baksana Assam-o dal•dalgipa project-rangko a•bachengate matchotatna man•aha.
BJP-ni program-rangni gimin talataniko on•angengon, Assam-o dal•batsranggipa ‘Orunodoi’ scheme-ni ning•o me•chikrangko mangrakbatatna jaanti on•enggipa gong 850-ko BJP dol, gong 3000-ona bariatgnok ine Nadda parakataha.
