Guwahati, Nov 10: Assam-o minority students’ scholarship fund-ni tangkarangko cha·aniko dingtang-dingtang sandiatanirangko dakani ja·man Assam a·dok gimikoni sak 21-mangni gita skulni skigiparangko mijal Sombar salo CID rim·aha ine koborko man·soaha.
Official-ni mijalo uamangni sandirokataniko tale-roke parakanganio, pre-matriculation scholarship-ni gong kror 10 tangka-paisarangko jakkalsretanirang dongaha ine talataha.
Koborrangko man·soani gitade, ia mamlao nangchape a·dokni dingtang dingtang district-rangnikoba sak 51-mangni gita dolsa policerang sandirokataniko dakatenga aro mikkangchi bang·akon rim·daproroangna man·naba donga ine ka·dongsoenga.
Sombar salo tanggitik noko nape sandirikkitataniko dakanio, sak-sni dos donggiparang, jeon Goalpara aro Darrang-oni sakprak, Kamrup metro-oni sak-dok aro Dhubri-oni saksa iamang gimikkon rim·aha ine official aganataha.
Gimik sak 21 dos donggiparangara – sakgnide me·chikrang, sakbri dal·batgipa skigiparang, sakgittam CSP-ni nokgiparang, saksa skigipa, sakgni education department-ni skulni inspectorrang aro sakchikkingara tik ka·time on·giparang ong·a. Una agreba, ge·gittam laptop-rang, ge 217 photo-rang, ge 100 certificate-rang aro ge 11 passbook-rang gimikkoba sekjolaha, ine official agandapaha.
Indake ong·engon, saksa Mamud Hassan minggipani badi ka·doangani ja·man matnanganga gita tangka cha·boka ingipani kosako sandirokataniko CID-chi dakangaha. 2018-2019 oni 2019-2020-bilsirango bang·pagijagipa jatoni poraigipa chatro-chatrirangna on·gipa Pre-matric scholarship-ni tangka-paisarangko jakkalsretaha ine Mamud Hassan ia bilsi August 28 tariko badi ka·doangaha.
Bang·pagijagipa jatoni poraigipa chatro-chatrirangna on·gipa Pre-matric scholarship fund-ara je chatrorangan porikkao 50% mark-rangko man·a aro jemangni ma·gipa-pagiparangni bilsio man·a gimikara gong lak 1-na badejachim, uandakgiparangna sorkarini dingtangmancha a·bachengatgipa central sector scheme ong·achim.
