Assam, Aug 17: Assam a•doko misilbegipa a•sel ong•anio bilsi 25 ong•gipa Suniram Madri, bilsi 55 ong•gipa Boila Hemram-ko sko sotaha aro walni somoio 25 km.mang chel•ako ja•achi Police station-ona sotgimin skoko ra•angenba an•tangko bame on•eaha. Ia a•sel ong•aniko video ka•e ra•anirang giproroangaha.
Koborrangko man•soani gitade ia a•sel tangka gong 500ni bidingo ong•angaha. A•selo ga•akgipa mande salni bako tangka gong 500ko srona bi•achim indioba ja•mano tangkako on•na jechakanina nanggrikaha.
Ia a•sel Assam-ni Sonitpur a•jani Rangapara Police Station-ni nirokani ning•o ga•akgipa Doyalpur songo ong•aha. Sombar walni somoion a•sel ong•genchimoba kanta 24 ja•mansa so•otani a•selrangko u•ina man•aha maina ian Assam aro Arunachal Pradesh-ni sima ari jolo donggipa ning•tubegipa songadamosa ong•aha.
Police doloni u•iatani gitade dos dakgipa Suniram Madri an•tangni so•otgimin Boila Hemram-ni skotengko ra•e Police station-na re•baaha. Ia a•selna bakan police-rang dosi dakgipako niamo rim•aha.
Koborrangko man•dapani gitade a•sel ong•ani salo songni manderang robol kal•susaanio cheanina do•bok mangsako boksis man•aha aro uko jinma cha•na ine do•bokko rasotna Boila Hemram-ni nokko re•pakangmitingo Suniram Madri, Hemram-ko nike re•pachina aganaha indioba re•na jechakanina aro una skang tangka 500-ko srona bi•o on•jani a•selna
ka•onange ka•mikkenatanirangna nanggrikanirang nadoaha.
Uandake Hemram-ko sko sotani ja•man Madri, skotengko noktangona jolonggao ra•angaha. Adagipa dal•gipa a•sel ong•ako u•ienba jonggipako doke rim•na jotton ka•beaha indiba kate chakani a•sel rim•na man•rikjaha. Uni ja•mano dos dakgipa an•tangan km.25mangni gita ja•achi sotgimin sko aro so•otna jakkalgipa silchidare gnang police station-ona re•angaha. A•selo ga•akgipa aro dos dakgipa sakgnian apsan songonin ong•a.
