Guwahati, April 13: India a•songo COVID-19 giprorotaiengahani gimin Assam-ona aeroplane-rango songrengbaenggipa manderang da•o airport-o COVID-19-na porikka ra•e nina nangtelgnok.
Ia gital standard operating protocol (SOP) ba niamni gitade, gipin biaprangoni aeroplane-rango songrebaenggipa manderang airport-o Rapid Antigen Test (RAT)-ko ka•telna nanggnok indiba iana manderang tangka paisako gamna nangjawa.
Porikka ra•e nianio ua mande positive ong•genchimode, noktango dingtang nape dongna nanggen ong•jaode, hospital ba health institute-rango donge sannaniko ra•na nanggen.
RAT porikka ra•anio ua mande negative ong•skagenchimode, airport-o gong 500-ko game RT-PCR-chi porikka ra•e niskana nanggen aro RT-PCR test-o positive ong•genchimode ua mande, noktango dingtang nape dongna nanggen ba hospital-rango donge sananiko ra•na nanggen.
RT-PCR test-o negative ong•genchimode manderang COVID-19-na dongimin niamrangko ja•rike an•tangtangni kamrangko ka•angna man•aigen.
“Assam-ona songrebaenggipa manderang ia niamrangko ja•riktelna nanggen aro skango dongimin niamrangko iachi ra•galskaengaha,” ine gital u•iatanio parakataha.
Assam aro salgro salaramni dingtang dingtang a•dokrango songdongenggipa manderang, jemangan Assam-ni airport-ona sokbaengachim aro salgro salaramni dingtang dingtang a•dokrangona songreangengachim, uandakgipa manderangde COVID-19-ni maming chinrang dongjagenchimode airport-o porikkarangko ra•na nangjawa indiba salgro salaram a•dokrangoni ong•a ine an•tangko mesokna gita sakki dongskana nanggen ineba u•iataha.
