Shillong, May 31: Assam-oniko Meghalaya a·dokni dingtang dingtang godown-rangona me·su samjakrangko salbaenggipa garirang, Umling entry point-o neng·nikanirangko chagrongna nangenga ine matnangenba, me·su salbaenggipa garirangna nanga gita chel·chakanirangko on·china Sombar salo, Khasi Jaintia Fresh Vegetable Suppliers’ Association (KJFVSA) aro Federation of Khasi Jaintia & Garo People (FKJGP), Meghalaya a·dokni Chief Minister Conrad K Sangma-ko didiangaha.
FKJGP-ni general secretary Dundee C Khongsit-ni parakatani gitade, ia entry point-rango sorkari official-rang, an·tangtangni kamrangkosa ka·engoba Meghalaya a·dokni dingtang dingtang biaprangona me·surangko salbaenggipa garini driver-rang neng·nikanirangko chagrongna nangrongengani gimin uamang iandakgipa driver-rangna dingtangmancha niamrangko ra·gatskae re·ruraani cholko on·china Chief Minister-ko didiangaha.
Assam-oni me·surangko salbaenggipa manderangna dingtang re·ruraani cholrangko on·skana man·na gita uamang association-ni gita sorkari baksa bakrimgen aro me·surangko salbaenggipa manderang neng·nikanirangko man·jana gita uamang driver-ni biming aro gipin nangchongmotgipa u·iatanirang baksana garini registration nombor-rangko sorkarina on·sogen ineba FKJGP-ni general secretary parakataha.
Me·su samjakrangara ta·raken soninggipa bostu ong·ani gimin ia me·su samjakrangko ta·raken palna man·jagenchimode salruraenggipa manderangna aro game ge·e cha·giparangnaba bang·en noksan ong·a ineba ua, ia neng·nikaniko niatchina gita Chief Minister-ko didiangaha.
Indake ong·engon, iani bidingo a·dokni Chief Minister, Mongolbar salon agriculture, health aro uandakgipa gipin department-rang baksana district administration-ni official-rang baksa chanchirimanggen aro ia neng·nikaniko chel·chakna gita ja·kuko de·anggen ine ku·rachakaniko on·ataha.
