Gangtok, July 23: Songsul a·song Sikkim a·dokni police dolni dakchakaniko man·e, a·dok ge·sa-ge·gipinona bang·a chonchongipa bi·sarangko badingsrukatenganiko Assam police chadrape rim·enba gimik sak 42 bi·sarangko naljokataha aro ia mamlao jak donggipa sakgni manderangkoba rim·aha.

Iani bidingo ja·pangoni koborna u·iatani gitade, badingsrukata man·gipa bi·sarangara bilsi 7 oni bilsi 10 ong·giparang ong·achim, jemangkon West Bengal aro Sikkim a·dokni sima joloniko naljokattokaha. Nambata skia-porako on·na mikmalate uamangko Assam a·dokni Chirang district-ni song damgittamoniko rim·angahachim indiba kakketde uamangko mande nokrangosa kam ka·atskaaha.

Assam-ni skotong minister Pa Himanta Biswa Sarma, naljokatgipa bi·sarangko Sukrobar salo gronge uamang baksa agangrikangaha aro iamangna dakchakanirangko on·ani bidingo apsan salon skotong minister tom·e chanchidilangaha jeon chugipa gadangni police officerrang baksana, DGP aro dingtang dingtang department-ni officialrangba bak ra·angtokaha.

Indake ong·engon, Assam, Chirang district-ni police dol, bi·sarangko gipin a·dokchina badingsrukataniko ja·kol sane rim·anio komibeoba jasa baten somoirangko nangaha.

Unomiting, Assam police-ni ia dal·begipa kamo chu·sokanina, Meghalaya-ni skotong Shillong-china mikkangbamitingo Sikkim a·dokni skotong minister Pa Prem Singh Tamang-ni agangangani gita, hajira kam ka·giparang ong·e sawarang uni a·dokona napbaengachim iarangko una skangde maming nirok-sandiatanirang grichim, indiba da·o uni sorkarini jako ra·ani ja·man iarangko nirok-sandiatanirangba dongaha ine parakatan baksana, sandiatani kamo chu·sokgipa ong·anina Assam police-koba ua dingtangmancha rasong on·e aganangaha.