Shillong, April 29: Assam Rifles-ni sipairang aro jolo songdongenggipa manderangni gisepo meli nangrimaniko ra•bana man•na gita Bristibar salo, Nongkrem constituency-ni MLA Lambor Malngiang, Deputy Commissioner, Superintendent of Police aro Assam Rifle-ni official-rang baksa tom•aniko ong•atangaha.
Re•anggipa Robibar attamo, Assam Rifles-ni sipairang aro jolo songdongenggipa manderangni gisepo adita so•sojengjeng ong•aniko nikna man•ahani gimin ia tom•aniko ong•atangaha.
Koborko on•ani gitade, re•anggipa April-ni 25 tarik walni 9:00 bajimango Assam Rifles-ni sipairang aro jolo songdongenggipa manderang, Lad Nongkrem-o donggipa Assam Rifles cantonment-ni mongsonggipa cholgugao nanggrikahachim.
Ia a•sel ong•ani bidingo am•sandianirangko dake report-ko on•ani ja•man East Khasi Hills a•jani DC-ba ua biapona re•ange ia a•selni bidingo sing•sandieahachim.
Nongkrem MLA Lambor Malngiang-ni kobor ra•timgiparangna u•iatani gitade, mikkangchi iandakgipa a•selrang ong•jana gita ua Assam Rifles-ni sipairangko, jolo songdongenggipa manderang baksa meli nangrime dongchina didiataha.
“Manderang baksa nanggrikanio jak donggipa sipaiko rim•e nanga gita sastiko on•gen ine Assam Rifles-ni Brigadier da•alo chingna aganaha. Mikkangchi iandakgipa a•selrang ong•taijachina angaba uamangko aganaha,” ine Malngiang parakataha.
Mikkangchi iandakgipa a•selrang ong•taigenchimode ua constituency-ni dilgipa ong•e, Assam Rifles-ni mongsonggipa campus-ona dakanggipa ramako chipatna draatako man•gen ineba Malngiang parakataha.
