Aizawl, Oct 23: Assam Rifles (East)-ni Inspector General-ni nirokatani ning·o, 23 Sector Assam Rifles-ni Lunglei Battalion, mija anti Sukrobar salo Mizoram-ni Siaha district-ni Chapi minggipa songoniko silchidarerang aro gulli-barutrangko man·aha ine ja·manchake koborko man·soaha.
Silchidarerangni dongani ba sriksrik badingani koborrangko man·sringani gimino mija October 21 tariko Assam Rifles aro Tuipang Police nangrime Chapi songoniko sandirikkitataniko dakataha. Uandake, sandiatgipa dolrang rama tong·sao salgipani gale katanggipa kenbo bike ba motocycle bolsaoniko sandina a·bachengaton bolgipin motorcycle ua somoio rang·san an·pile katangskaaha.
Gale donanggipa motocycle-oniko dolsagipa sipairang sandiataha aro bangkirang sakgipin sale katgipako rikangtokskaaha. Sandiatanio, silchidarerang aro gulli-barutrangko man·aha indiba mandeko man·rikjaha.
Iani bidingo Assam Rifles official-ni u·iatani gitade, sandiatao bolsa 0.22 rifle, gulli rong 30-rang, rongsa grenade aro kenbo bike-ko man·rikaha, indake man·gimin bosturangko niam gita kamrangko ka·angchina aro sandidapaniko dakangna gita Tuipang police station-na pakwatataha.
