Guwahati, Oct 31: A·songgipinchini songrebagipa saksni manderangko rim·an baksana uamangko a·songtangchi watpilatani ja·man, visa-ni niamrangko pe·e toromni bidingo skiprakanirangko dakenggipa a·songgipinoni manderangko nirikkichina aro mikrake dongchina gita Assam sorkari, a·jani pilak district-ni superintendent of police (SP)rangna ge·etaniko on·angaha.

Batanggimin jasani gisepon, Assam a·dokni damgittam district-rangoniko sak 17 Bangladesh-ni manderangko aro sak 10 Europe a·songni manderangko man·gope gimik sak 27 mangko rim·e rakkia baksana uamangko a·songtangtangchi watpilatani ja·man iani bidingo sorkari ge·etaniko on·angskaaha.

Uamang gimikan missionary visa-o ong·gija tourist visa-chi India a·songoba songrebagiparangsa ong·achim ine nikatna man·gen.

Iani bidingo koborna agan-talatangengon, pilak toromoniba ong·china, a·songgipinchini tourist visa-o re·bagipa manderangni niam gri toromni bidingo skiprakanirangko, tom·dilanirangko nirikkiatchina gita district-tangtangni pilak SP-rangna chinga ge·etaniko on·aha ine Assam-ni Special DGP, GP Singh parakataha.

“A·songni niam gitade, toromni bidingo skiprakna gita re·bana nangnikgiparangde missionary (M1) visa-ko ra·na gita nanga, tourist visa-chi toromni gita kamrangko ka·aniara niamko pe·a ga·aka,” ineba Singh agandapataha.

Singh-ni aganangkuani gitade, missionary visa-chi songrebagipa manderangna mangba a·songni ning·o dakna-ka·na on·gimin bilrang dingtang dingtang donga baksana champengatanirangba gnang ine talatenba, missionary visa-chi toromtangona salaniko rim·a man·ode niam gita sastiko on·angen ineba mikrakataha.

Indake ong·engon, iandakgipa dolrangna ba manderangna mikkangchi visa-rangko on·gnikoba special branch-ni gita champengatsrangchina, India sorkarini ning·o iako dingtangmancha jako ra·e kamrangko ka·atenggipana a·dok police chittirangkoba sedoataha.