Shillong, Aug 12: Meghalaya-ni gital Assembly Building-ni be•gropani kosako audit report tarianirang matchotsrangkujaenga ine Speaker Metbah Lyngdoh August 12 tarik-o parakataha.
Ia a•sel ong•ani kosako report tarianirangko ia jani gisepon on•china Skotong Minister-naba gisik ra•atpiltaianiko on•manaha jedakode uamang High Powered Committee (HPC) baksa chanchirimaniko ta•rake dake nanga ja•ku de•aniko dakangna chol ong•anggen ineba Lyngdoh u•iataha.
Lyngdoh-ni janapatani gitade High Powered Committee baksa chanchirimaniko uamang batanggimin jao bon•kame dakaha.
“Koborrangko angni man•soani gitade, audit report tarianirang matchotna bang•jaengaha. Indioba nokko pangchakna on•gipa krongrangko rikani bewalrangko name sandie aro nok rikchengani somoio pangchakna ro•ong su•songgiminrangkoba nipiltaie PWD department-ni report tarianikoba man•na nangenga,” ineba Lyngdoh talataha.
