Shillong, March 05: Adita salna skang a·doko assembly-na pu·onatgipao dam 59 constituency-rango manderangni seoke watata man·gipa gital MLA-rang, re·baenggipa March 6 tarik chong·motan Sombar salo, Shillong, Rilbong-o donggipa Assembly Building-o kakket aro bebeo a·dokni manderangna dangdike on·na gita ku·rachakaniko dakangnasienga.
Iani bidingo State Assembly-ni Commissioner and Secretary-ni u·iatani gita, sak 59 MLA-rang Sombar salo 11-gipa Meghalaya Legislative Assembly-ni memborrang ong·e Pro tem speaker-na seokako man·gipa Pa Timothy D Shira-ni dakdilanichi ku·rachakaniko dakanggen.
Indake ong·engon, eleksinna skang mangmang Sohiong constituency-o UDP candidate-ni tanggitik ong·e a·gilsakko watangani gimin India-ni Election Commission, ua constituency-o pu·onataniko changgipinona ra·doatskaaha aro Sohiong constituency-o eleksinko ong·atani ja·manosa house-o sak 60 memborrangde chu·onggen ine nikatna gita man·enga.
Sawa aro badia Meghalaya-o gital sorkariko rikchakatgen iani gimin susagrikani ong·engon, NPP dol gimik sak 32 MLA-rang baksa gitalgipa sorkariko rikchakattaina tariaha aro NPP-ni skotong dilgipa Pa Conrad K Sangma, re·anggipa salo BJP-oni sakgni, HSPDP-oni sakgni aro jakgitele susagipa sakgni MLA-rangni chakpaaniko man·ani chittikoba a·dokni Governor-ko gronge on·angjolaha.
Assembly-ona seoke watata man·giparangni ku·mikchetaniko, re·baenggipa Mongolbar salo Shillong, Raj Bhawan-o ong·atanggen, jeon a·songni Prime Minister baksana ma·mongni Home Minister-koba bak ra·epagen ine ka·dongsona gita manenga.
