Shillong, Nov 10: Meghalaya Community and Rural Development Minister, Pa Hamletson Dohling, Water Resources Minister, Pa Brolding Nongsiej, Eastern West Khasi Hills a·jani Deputy Commissioner, Pa W. Nongsiej, Mairang C&RD Block-ni BDO, Dr. L. R Hynniewta aroba sorkarini gipin officialrang gimikni dongpaanio, Mairang Community and Rural Development Block-ni gital office nokko Mairang Block office-ni biapo rikna gita pangchakani ro·ongko songanganiko Bristibar salo, Meghalaya Legislative Assembly-ni agan-chalaitimgipa Pa Metbah Lyngdoh jinmana parakataha.
Programona mongsonggipa sokgipa ong·e jinmana aganprakangengon, Pa Metbah Lyngdoh, a·dok sorkari aroba ma·mong sorkarini dingtang dingtang scheme-rang aro programme-rangko ra·gate on·anichi songni-nokni manderang aro a·dok sorkarini gisepo nangrimaniko ra·bagipa gita chacha a·doko namen gitchambegipa Mairang C&RD Block-ni kamrangko ka·e on·anirango gamchataniko agan-parakataha.
Ia tom·anio, Assembly-ni agan-chalaitimgipa, gital Mairang Block office-ko ru·utgijan rikchakatna gita gong kror 2 aro lak 88 tangka-paisarangko chame on·na gita gisiko nangbee jotton ka·ahanina Community & Rural Development Minister Pa Hamletson Dohling-koba de·mittele aganangjolaha.
Indake ong·engon, tom·ao jinmana aganprakatanio, Meghalaya Community and Rural Development Minister Pa Hamletson Dohling, batanggimin adita bilsini gisepo a·doko, Self Help Group (SHG) ni kamrango tang·doanirangko, Community and Rural Development Department-ni kamo, mongsongbate MNREGS-ko ra·gate on·anirango chu·sokgipa ong·anirangko aganangskaaha.
Unbaksana, a·dokni gimik dam 6 block-rangna gong kror 2.50 ka·e chamatgipa tangka-paisarangchi aro gipin ge 40 block-rangna chamgnigipa gong kror 120 -rangchi a·dokoni gimik ge 46 C&RD Block-rangna gital office nokrangko rike on·nasienganikoba u·iatangjolaha.
