Shillong, Oct 4: Mawdiangdiang-o gital rikenggipa Assembly-ni protchong be·gruaniko sandirokna gita IIT-Guwahati-ko songanio Assembly Secretariat maming dakeba jak dongja ine Mongolbar salo, Assembly-ni Speaker Metbah Lyngdoh a·kangataha.
Gital Assembly-ko rikenggipa dolgni contractor-rang baksa bak donggenchimoba, ia a·selni bidingo sandirokna gita a·dok sorkarini IIT-Guwahati-ko seokani bidingo sing·anina ua ia kattarangko aganaha.
Assembly Speaker-ni parakatani gitade, gital Assembly nokko rikna contract man·gipa dolrang baksa IIT-Guwahati bak donga ineba ua ma·sia dongjachim.
Gital Assembly nokko rikna gita champengatako man·gimin contractor-rangna on·ahani gimin sing·skaon, ian Assembly-o maming nangchakeani dongja ine Lyngdoh parakataha.
“Iani bidingo na·simang, sorkari aro PWD-o sing·sandie ra·na man·gen,” ine Assembly Speaker, kobor ra·timgiparangna aganaha.
Mawdiangdiang-o rikenggipa gital Assembly-ni protchong be·gruaniko sandirokna gita gital dake Indian Institute of Technology (IIT) Rourkee-na pakwate on·skachina gita re·anggipa September 30 tariko a·dokni Opposition All India Trinamool Congress (AITC) dabiangahachim ine nikna man·a.
