Shillong, Nov 13: Meghalaya Assembly-o autumn session-na tom·ani bongagipa salo, a·doko songdonggipa manderangna sorkarini dangdike on·anio nangchapgipa Meghalaya Right to Public Services Bill baksana gipin ming-bri bill-rangkoba ra·chakangaha.
Meghalaya Right to Public Services Bill-chi a·dokni manderangna sorkarini dangdike on·ani kamrango maioba chu·onggijanirang ba komianirang dongode sorkarini officialrangko uana aganchakna nanggipa ong·atgen ine skotong minister Pa Conrad Sangma agan-talataha.
“Pilakan aganchakna nanggipa ong·ode, sorkariba iano bak man·pagipa ong·e, officialrangba uamangni dingtang dingtang kamrango dangdike on·anio a·dokni manderangna aganchakskana nanggipa ong·a,” ine agane, a·dokni manderang ia bill-ko man·na krachongmota ineba ua agandapaha.
Indake ong·engon, bill-ko bimang ong·atna skangan Congress-ni MLA sakgni Pa Mayalborn Syiem, Pa George B Lyngdoh-maang ia bill-o adita taridapna ba on·dapna nanganirangkoba minge ra·baaha.
A·doko songdonggipa manderangna dangdike on·anio, pangchakna gita maming a·sel grian officerrang uko ru·utata ong·ode, niam gita uamangni kosako ja·kurangko de·ata baksa dai gamataniko man·chape badi ka·doaniko dakna dorgastona tangka pelsaba nangmangija indin on·aniko Pa Syiem agan-ku·pattiaha.
Iarangna aganchakengon, kam ka·ani bewalo agre bal-bojako ong·jana gita nangbregijagipa badi ka·anirangkoba jedakode gelna man·jawa una tangkako gamnade nangaigen, indiba gamna nanggipan RTI-o jedake ong·a, ugita komibeesan ong·aigen ine Pa Sangma aganaha.
Niam gita ja·kurangko de·atani gimin agan-ku·pattianina, ua indine aganchakaha je, gong 5000-ko dai gamna nanggipan bang·ahani gimin iako da·omanchade dakna nangkujawa, maina ia bill-ni miksonganian offcialrangko kamtangtango daito ra·e ka·na nanggipa ong·a ine ma·siatnasan ong·a.
Bill-o de·e ra·bagipa kamrangko napchapatanichi jensomaio iako niam dakahaon Assembly-na bal-bojako gatdapa gitasa ong·aigen, maina je kamrangko ka·na gita bill-o sulsul on·soaha uarangko house gitan chanchirime nipiltaianiko dakna nangaigen, ineba ua u·iataha.
