Nishangram, Feb 7: Assam-ni A·chik jatrangna GAC-ko on·china Assam sorkario kingkot dabienganio bak dongpagipa aro songsalna kam ka·enggipa dolsa, A·chik Socialist Youth Front of India (ASYFI), United Garo Autonomous Council Movement Committee (UGACMC)ni kamrangko raken jegalataha.
ASYFI-ni padot ong·e da·o kamko jako ra·engipa Sengrak W. Sangma-ni koborna seachi u·iatani gita, Assam a·doko songdongenggipa A·chik jatrangna ru·uta bilsirangonin Garo Autonomous Council (GAC)ko on·china Assam sorkario dabibaengachim, uni gisepon UGACMC, GAC-ko on·china dabia dake Assam sorkarini on·enggipa Garo Development Council (GDC)ko ra·chakahani gimin ASYFI uamangni kamko raken jegalenba namnikgijaniko parakataha.
ASYFI, Assam a·dokoni dolsa songsalna kamko ka·gipa ong·pae skangonin GAC-na dabianio jak on·paengachim, indiba ASYFI-ni padot Tengrak Marak, dolni ka·rimskarang baksa maming chanchichenggija UGACMC baksa barime GDC-ko ra·chakanio jak dongpae da·o Assam sorkarini on·enggipa GDC-ni membor ong·aniara dolni kosako donnue dakachi cha·bokani gita ong·aha. Uni kragija kamko ASYFI ra·chakna man·jawa ine jegalan baksa uko ASYFI-ni padotoniko ra·galna mijal Sonibar salo executive tom·e chanchirimaha ine Sangma, koborna seachi janapataha.
UGACMC, maming dakeba GAC-na dabianio kakket ong·ja, indiba an·tangtangni man·gnina mikpakma nie kamko ka·giparangsa ong·a ine matnangatenba, iandakgipa kamo ASYFI mamingchiba bak dongja, indiba Tengrak Marak-ni a·selsa dolni dilgiparang krat-cha·atako man·aha ineba ASYFI -ni dilgipa parakataha.
ASYFI, dolsa songsalna kam ka·gipa ong·paeming Assam-o songdong-a·chaenggipa A·chik jatrangni namgnina mikkangchiba ja·kurangko de·e GAC-na dondikgija dabianiko dakangkugen ine dolni padot janapatjolaha.
