Aradonga, Oct 22: October 21 tariko Aradonga FKJGP dol,  Athiabari oni Umshiak ona tarignigipa PMGSY rama jekon ru·uta somoirangonin galchipe donahachim uni obostako nina re·anganio West Khasi Hills, Mawsynrut C&RD Block ni ning·ao gipa Umshaik Dorbar-ni manderangni tom·chimonge rama tariengakosa nikeaha ine FKJGP Aradonga Area Unit ni Padot Te. Tellingster D. Shira aganaha.

Songni nokni dilgiparangni aganani gitade ua rama ko tarie on·china changni chang sorkariko molmoloba knachakjaha ja·manode sima ari suale donganio adita meligrikgijanirang ong·ahani gimin Assam Sorkari uko dontongatsrangaha. Uamangni aganani gitade songni nokni gita Umshiak Dorbar ni Padot Pa. Robin I. Sangma ni dilanio lekka seanirang baksa West Khasi Hills ni Deputy Commissioner ko grongeaan changgni ong·pilahachim indiba da·onan maming ja·kukon ga·kujaenga.

Mikka wachi kari rango chinga re·a doanio namen neng·nikaniko chagrongani giminsa sorkarini dakchakako nisenggija biltangtang  jaktangtangchi ia galchipgimin PMGSY ramako tarienga ine aganaha.

Indake manderangni neng·nikanirangko nie dongaigija ka·sapae tarigija gale dongimin PMGSY rama ko kam a·bachengatpiltaipabo ine FKJGP dol Sorkariko molmolaha.