Shillong, April 14: Ayushman Bharat Program-ni bilsi gittam gapaniko maniani bak gita Ayushman Bharat – Health & Wellness Centre (AB-HWC)-rangni Comprehensive Primary Health Centre (CPHC)-ni ning•o ra•gatgipa dingtang dingtang kamrangni bidingo a•dokni state nodal officer-rangna aro district nodal officer-rangna talataniko on•na State National Health Mission-ni gita program-ko Shillong-ni Moreau Institute of Integral Training (MIIT)-o ong•atangaha.
Ia program-ko ong•atanio a•dokni Health Minister AL Hek mongsonggipa sokgipa ong•e bakko ra•angaha aro ia tom•anio National Health Mission-ni Mission Director Ram Kumar, Health Services (MCH & FW)-ni Director Dr RF Tariang, Health Services (MCH & FW)-ni Joint Director Dr SS Nongbri aro gipinrangba dongpae bak ra•angaha.
Ia program-ko ong•atanio a•dokni Health Minister AL Hek, jinmana aganprakangengon, CPHC-ko bilsi gittamna chalaianio chu•sokgipa ong•atahani gimin Health & Wellness Centre-rangni frontline worker-rangko mittelpilangaha.
A•doko songdongenggipa mande sakantinan an•seng baljokaniko on•na man•na gita a•dokni dingtang dingtang biaprango ia health & wellness centre-rangni dakna nanggni kamrangkoba ia tom•anio Hek talate on•angjolaha.
Dingtang dingtang sabisi sakanchirangni bidingo manderangna bilakbate mikrakatanirangko on•china gita a•dokni health official-rangko didiangengon, Megha Health Insurance Scheme (MHIS)-ni ning•o on•enggipa dingtang dingtang dakchakanirangko ra•na man•na gita ia scheme-ni ning•o an•tangtangni bimingrangko segatchina Health Minister, a•doko songdongenggipa manderangko didiangaha.
Ia tom•anio NHM-ni Mission Director Ram Kumar-ba jinmana aganprakengon, frontline worker ba mikkango donge kamko ka•enggipa manderangna kamrangni bidingo skie on•anichi health & wellness centre-rango kam ka•aniko nambatatchina didiangaha.
Ia program-ko ong•atanio a•dokni Health Minister AL Hek, dingtangmancha 2018 bilsioni kam ka•enggipa AB-Health & Wellness centre-rangni bidingo segimin Coffee table book baksana gipinrangkoba oprake on•angjolaha.
Ia tom•anio nambatgipa health & wellness dolrangnaba Minister-ni jakchi mande ra•pilskaaniko dakangaha, jeon nambatgipa CPHC District-ni boksisko West Garo Hills-na on•angaha.
