Tura, Sep 29: India a•songni jakgitelaniko man•aoni bilsi 75 gapaniko manienggipa Azadi ka Amrit Mahotsav-ni bak gita Bristibar salo, Tura-ni Nehru Yuva Kendra, dingtangmancha Yuva Utsav Festival-ko Tura-ni District Auditorium-o ong•atangaha aro ia program-ko ong•atanio dingtang dingtang skulni chatro chatrirang, skigiparang aro gipinrangba bakko ra•angtokaha.
Ia Yuva Utsav Festival-ko ong•atanio noksa salsusaani, poedo sesusaani, photography ba jachipchang ka•susaani aro aganpraksusaanirangko ong•atangaha, jeon dingtang dingtang skulni chatro chatrirang bakko ra•angtokaha.
Ia salni attamchibara dingtangmancha cultural program-ko ong•ate dingtang dingtang jatrangni chrok mesaanirangkoba mesokangaha aro ia cultural program-ko ong•atanio Tura-ni gitcham MLA Billykid A Sangma, mongsonggipa sokgipa ong•e bakko ra•angaha.
Ia program-ko ong•atanio Tura-ni gitcham MLA, jinmana aganprakangengon, India a•songo songdongenggiparang ong•e an•tangtangni dakna nanggni kamrangni gimin gisik ra•atpilaniko on•angaha aro chadamberangkoba jattangtangni dakani rikani aro an•tangtangni changa sapanirangko mesokchina didiangaha.
